Grunnþjálfun í Canvas – Skref fyrir skref

Í þessum hluta lærir þú að endurnýta efni úr eldra Canvas-námskeiði. Þú getur annaðhvort afritað allt námsefnið, valið tiltekna hluta þess eða afritað stök atriði.

Myndband

Í myndbandinu skaltu sérstaklega taka eftir:

Hvernig þú flytur inn námsefni úr öðru námskeiði í námskeiðið sem þú ert með opið.
Hvernig þú velur hvort flytja eigi inn allt námsefnið eða aðeins tiltekin atriði.
Hvernig þú fylgist með framvindu innflutningsins og kannar hvort efnið hafi skilað sér í námskeiðið.

Tvær leiðir til að flytja efni

Afrita allt eða valið efni

Byrjaðu í námskeiðinu sem á að fá efnið.

Heim → flyttu inn núverandi efni

Afrita stök atriði

Byrjaðu í námskeiðinu sem inniheldur efnið.

Þrípunktur → afrita yfir á

Að afrita allt námsefnið eða valin atriði

Notaðu þessa aðferð þegar þú vilt endurnýta heilt námskeið eða velja tiltekið efni úr öðru námskeiði.

Þessi aðferð hentar vel þegar þú veist hvaða efni þú vilt afrita úr eldra námskeiði. Þú byrjar í námskeiðinu sem á að fá efnið og velur hvort afrita eigi allt námsefnið eða tiltekin atriði. Gott getur verið að hafa eldra námskeiðið opið í öðrum flipa til að skoða efnið samhliða.

Athugaðu: Ef þú velur að afrita allt efnið fylgja tilkynningar úr eldra námskeiðinu einnig með. Ef þú vilt ekki fá tilkynningarnar með, eða vilt einungis fá valdar tilkynningar með, skaltu frekar velja tiltekið efni.

Opnaðu námskeiðið sem á að fá efnið.
Veldu flyttu inn núverandi efni (e. Import Existing Content) hægra megin.
Veldu afrita Canvas-námskeið og leitaðu að námskeiðinu sem þú vilt afrita úr.
Merktu við annað hvort allt efni eða veldu tiltekið efni og smelltu á bæta við innflutningsbiðröð.
Ef þú merktir við veldu tiltekið efni skaltu smella á veldu efni. Gluggi opnast þar sem þú velur hvað á að afrita. Athugaðu að smella á örvar til að opna valkosti.
Smelltu á velja efni. Keyrslan fer í gang þar sem þú getur fylgst með framvindunni.

Skoða myndskreyttar leiðbeiningar HÍ.

Að afrita stök atriði með „afrita yfir á“

Þessi aðferð hentar vel þegar þú ert að skoða efni í eldra námskeiði og ákveður að nýta það aftur. Þú getur opnað síðu og valið afrita yfir á í þrípunktavalmyndinni efst, eða notað þrípunktinn við einingu, verkefni, skrá eða annað atriði.

Athugaðu: Ef þú afritar heila einingu fylgir allt efni hennar með.

Opnaðu námskeiðið sem inniheldur efnið.
Smelltu á þrípunktinn við atriðið sem þú vilt afrita.
Veldu afrita yfir á (e. Copy To).
Veldu námskeiðið sem á að fá efnið og, ef við á, í hvaða einingu og hvar það á að birtast.
Staðfestu afritunina og skoðaðu atriðið í nýja námskeiðinu.

Afritað efni birtist á viðeigandi stað í nýja námskeiðinu, til dæmis síður undir síðum og skrár undir skrám í valmynd. Þú getur einnig valið að setja atriði í tiltekna einingu þegar sá möguleiki er í boði.

Skoða myndskreyttar leiðbeiningar HÍ.

Yfirfarðu efnið eftir afritun

Afritað námsefni er ekki endilega tilbúið til notkunar í nýju námskeiði. Skoðaðu efnið og athugaðu sérstaklega:

Dagsetningar verkefna og prófa og aðrar tímastillingar.
Tilkynningar og upplýsingar sem eiga einungis við fyrri kennslu.
Tengla, myndir og skrár – sérstaklega ef þú afritaðir aðeins hluta efnisins.
Verkefni sem voru sett upp með viðbótum, svo sem FeedbackFruits, og tengingar í önnur kerfi.
Birting efnis – Athugaðu hvort einingar og einstök atriði séu birt. Mundu að bæði einingin og atriðið sjálft þurfa að vera birt svo nemendur geti séð efnið.
Upptökur í Panopto þarf að flytja eða afrita sérstaklega í annað námskeið. Það er gert í Panopto. Sjá upptaka flutt á milli námskeiða á canvas.hi.is. Upplýsingatæknisvið veitir aðstoð ef þarf (hjalp@hi.is).

Er efnið lengi á leiðinni?

Afritun námsefnis getur tekið nokkurn tíma, sérstaklega ef mikið efni er afritað eða álag er á Canvas.

Þú getur fylgst með framvindunni undir flyttu inn núverandi efni. Bíddu þar til staðan sýnir lokið og yfirfarðu efnið áður en þú reynir aftur. Annars er hætta á að efnið afritist tvisvar og þú þurfir að eyða umframefninu handvirkt, atriði fyrir atriði.

Ef sama efni er flutt inn aftur getur það einnig skrifað yfir fyrra afritið og breytingar sem þú hefur gert á því.

VERKEFNI

Prófaðu að afrita efni

1. Veldu síðu eða verkefni á einu námskeiði og afritaðu það yfir á æfingasvæðið þitt með aðgerðinni afrita yfir á.

2. Opnaðu æfingasvæðið, finndu afritaða efnið og athugaðu hvort allt hafi skilað sér rétt.

Að lokum skaltu velta fyrir þér:

Hvenær myndirðu velja að flytja inn efni í nýja námskeiðið og hvenær að nota afrita yfir á?

SJÁLFSMAT

Hvað hefurðu lært?

Að þessum hluta loknum ættirðu að geta:

Afritað allt námsefni eða valin atriði úr eldra námskeiði.
Afritað staka síðu, verkefni eða einingu með afrita yfir á.
Yfirfarið afritað efni og gert nauðsynlegar breytingar áður en það er notað í kennslu.

Spurningar eða ábendingar?

Var eitthvað óskýrt eða vantar upplýsingar? Við tökum gjarnan við spurningum og ábendingum sem hjálpa okkur að bæta námskeiðið.

Sendu okkur skilaboð á kennslumidstod@hi.is