Grunnþjálfun í Canvas – Skref fyrir skref

Í þessum hluta lærir þú að skoða námskeiðið eins og nemandi, prófa aðgang að efni og verkefnaskil og átta þig á því hvað nemandasýn getur – og getur ekki – sýnt.

Myndband

Í myndbandinu skaltu sérstaklega taka eftir:

Hvar þú velur skoða sem nemandi og hvernig nemandasýn er auðkennd.
Hvernig þú kannar hvort síður, einingar og skrár séu aðgengilegar.
Hvernig þú getur skilað æfingaverkefni sem prófunarnemandi.
Hvernig þú ferð úr nemandasýn og endurstillar nemandann þegar þörf er á.

Smelltu á litlu örina neðst í spilaranum til að sjá kafla myndbandsins og velja þann sem þú vilt skoða.

Til hvers er nemandasýn notuð?

Með skoða sem nemandi geturðu farið um námskeiðið frá sjónarhorni almenns nemanda. Canvas býr þá til prófunarnemanda sem þú getur notað til að prófa aðgang að birtu efni og venjuleg verkefnaskil.

Þetta er gagnleg yfirferð áður en kennsla hefst og í hvert sinn sem nýju námsefni eða verkefnum er bætt við.

Hvað er gott að prófa?

Hvort heimasíðan og leiðarstýringin séu skýr.
Hvort einingar, síður og skrár opnist.
Hvort verkefnalýsingar og skilamöguleikar virki.
Hvort tenglar og upptökur opnist eins og til er ætlast.

Hvernig prófa ég námskeiðið?

Farðu í nemandasýn

Veldu skoða sem nemandi efst í námskeiðinu.

Prófaðu það sem nemendur gera

Opnaðu efni og prófaðu að skila verkefni.

Að fara í nemandasýn

Opnaðu námskeiðið þitt og smelltu á skoða sem nemandi efst til hægri.
Canvas sýnir bleikan ramma þegar þú ert í nemandasýn.
Skoðaðu heimasíðu, leiðarstýringu, einingar og önnur birt atriði eins og nemandi.
Til að ljúka skaltu velja Fara úr nemandasýn neðst til hægri. Það nægir ekki að bakka í vafranum.

Óbirt atriði eiga ekki að birtast prófunarnemandanum.

Að prófa verkefnaskil og skoða niðurstöðuna

Veldu birt æfingaverkefni sem leyfir skil frá nemanda.
Skilaðu til dæmis lítilli skrá eða texta eins og prófunarnemandi.
Farðu úr nemandasýn og opnaðu SpeedGrader eða einkunnayfirlit kennara til að skoða skil prófunarnemandans.
Þú getur gefið prófunarnemandanum einkunn eða endurgjöf og síðan farið aftur í nemandasýn til að sjá birtinguna.

Þetta gerir þér kleift að prófa ferlið beggja vegna, frá skilum til endurgjafar.

Að endurstilla prófunarnemandann

Ef þú vilt hreinsa fyrri skil og einkunnir prófunarnemandans skaltu fara í skoða sem nemandi og velja Endurstilla nemanda neðst til hægri.

Endurstilling hreinsar hefðbundin prófunargögn, en ekki er tryggt að öll ummerki um þátttöku, til dæmis í umræðum, hverfi. Notaðu því prófunarnemandann meðvitað.

Athugaðu!

Nemandasýn hefur takmarkanir

Hópar: prófunarnemandinn getur ekki verið í hópi. Nemandasýn nýtist því ekki til að prófa skráningu í hópa og hópumræður.

Sértækar úthlutanir: efni sem er eingöngu ætlað ákveðnum nemendum eða hluta nemendahópsins birtist ekki hjá prófunarnemandanum.

Ytri verkfæri: sumar viðbætur og samþættingar virka ekki eins í nemandasýn og hjá raunverulegum nemanda.

Ný próf (e. New Quizzes): Notaðu sérstaka forskoðun prófsins til að prófa spurningar og stillingar. Ekki taka prófið sem prófunarnemandi því þær tilraunir geta haft áhrif á tölfræðiskýrslur prófsins og ekki er hægt að treysta því að þær hverfi við endurstillingu prófunarnemandans.

Viltu kynna þér efnið nánar?

Í Canvas-leiðbeiningum HÍ finnurðu nánari útskýringar á nemandasýn, prófunarnemanda og endurstillingu hans.

Nemandasýn og prófunarnemandi – Canvas-leiðbeiningar HÍ ↗

VERKEFNI

Prófaðu námskeiðið í nemandasýn

Opnaðu æfingasvæðið þitt í Canvas.

Veldu skoða sem nemandi og skoðaðu heimasíðu og leiðarstýringu.
Opnaðu birta einingu, síðu og skrá. Athugaðu hvort þú getir skoðað allt efnið.
Prófaðu að skila verkefni sem prófunarnemandi, ef þú hefur þegar stofnað æfingaverkefni.
Farðu úr nemandasýn og skoðaðu skilin í kennarasýn.
Farðu aftur í nemandasýn og finndu valkostinn Endurstilla nemanda.

Að lokum skaltu velta fyrir þér:

Hvaða atriði myndirðu alltaf yfirfara í nemandasýn áður en námskeiðið hefst?

SJÁLFSMAT

Hvað hefurðu lært?

Að þessum hluta loknum ættirðu að geta:

opnað námskeið í nemandasýn og farið aftur í kennarasýn.
kannað hvort námsefni og verkefni séu aðgengileg nemendum.
skilað verkefni sem prófunarnemandi og skoðað skilin sem kennari.
endurstillt prófunarnemandann þegar þess er þörf.
útskýrt helstu takmarkanir nemandasýnar, einkum varðandi hópa og sértækar úthlutanir.

ⓘ Spurningar eða ábendingar?

Var eitthvað óskýrt eða vantar upplýsingar? Við tökum gjarnan við spurningum og ábendingum sem hjálpa okkur að bæta námskeiðið.

✉ Sendu okkur skilaboð á kennslumidstod@hi.is