Grunnþjálfun í Canvas – Skref fyrir skref

Í þessum hluta lærir þú að skipuleggja verkefni í verkefnaflokka, stilla vægi þeirra í lokaeinkunn og átta þig á því hvernig punktafjöldi verkefna hefur áhrif á útreikning einkunna.

Myndband

Í myndbandinu skaltu sérstaklega taka eftir:

Hvar verkefnaflokkar eru stofnaðir og hvernig verkefnum er raðað í þá.
Hvar vægi verkefnaflokka er virkjað og prósentur skráðar.
Hvernig vægi verkefnaflokka og punktafjöldi verkefna hafa mismunandi hlutverk.
Hvernig skiptingin birtist í einkunnabókinni.

Smelltu á litlu örina neðst í spilaranum til að sjá kafla myndbandsins og velja þann sem þú vilt skoða.

Verkefnaflokkar og vægi

Í Canvas eru verkefni, próf og umræður sem gefin er einkunn fyrir skipulögð í verkefnaflokka. Hver flokkur getur innihaldið eitt eða fleiri matsatriði.

Með því að gefa verkefnaflokkum mismunandi prósentur ákveður þú hvað hver hluti námsmatsins vegur í lokaeinkunn.

Verkefnaflokkur

Til dæmis Verkefni, Próf eða Þátttaka. Vægi er ákveðið fyrir flokkinn í heild.

Punktar verkefnis

Punktar ákvarða hámarksstig fyrir stakt verkefni og hafa áhrif á hlutfall þess innan verkefnaflokksins.

Dæmi um skiptingu námsmats

40%Verkefni

60%Próf

Samanlagt vægi er 100%. Innan verkefnaflokksins Verkefni geta verið mörg verkefni.

Hvernig stilli ég vægi verkefna?

Byrjaðu undir verkefnum

Þar stofnar þú verkefnaflokka, raðar matsatriðum og virkjar vægi.

Yfirfarðu einkunnabókina

Breytingar á verkefnaflokkum og vægi endurspeglast í einkunnabókinni.

Stofna verkefnaflokka og stilla vægi

Opnaðu Verkefni í valmynd námskeiðsins.
Stofnaðu verkefnaflokka með viðeigandi heitum, til dæmis Verkefni og Próf.
Smelltu á þrípunktinn efst hægra megin á verkefnasíðunni og veldu Vægi verkefnaflokka.
Virkjaðu vegið námsmat og skráðu prósentu fyrir hvern verkefnaflokk. Gott er að láta vægið samtals vera 100%.
Vistaðu og athugaðu hvort matsatriðin séu í réttum flokkum.

Athugaðu að í eldri skjámyndum og upptökum kann að standa verkefnahópur þar sem nú er notað orðið verkefnaflokkur.

Hvernig hefur punktafjöldi áhrif á vægi?

Segjum að verkefnaflokkur vegi 40% af lokaeinkunn og innihaldi tvö verkefni:

Verkefni A: 10 punktar
Verkefni B: 20 punktar

Þá vegur B tvöfalt meira en A innan flokksins. Það fær því tvo þriðju af 40% vægi flokksins, en A einn þriðja.

Ef verkefnin eiga að vega jafnt innan sama flokks þurfa þau að hafa sama hámarkspunktafjölda.

Viltu að eitt tiltekið verkefni hafi sérstakt vægi? Þá geturðu sett það í eigin verkefnaflokk.

Ef verkefni á ekki að telja með í lokaeinkunn

Æfingaverkefni og æfingapróf þurfa ekki alltaf að hafa áhrif á lokaeinkunn. Þú getur annaðhvort:

sett þau í verkefnaflokk með 0% vægi, eða
valið í stillingum viðkomandi verkefnis að reikna það ekki með í lokaeinkunn.

Skoðaðu einnig hvort námsmat af gerðinni lokið/ólokið eigi að telja með. Slík matsatriði þurfa punkta til að taka þátt í útreikningnum.

Athugaðu!

Áður en námskeiðið hefst

Berðu vægið saman við kennsluáætlunina. Skiptingin í Canvas þarf að samsvara því námsmati sem nemendum hefur verið kynnt.

Gættu að tómum einkunnareitum. Canvas reiknar að jafnaði út frá matsatriðum sem þegar hafa fengið einkunn; auður reitur jafngildir ekki sjálfkrafa 0.

Ekki rugla saman verkefnaflokki og nemendahópi. Verkefnaflokkar stýra útreikningi einkunna, en nemendahópar eru notaðir við hópvinnu.

Ítarlegri aðgerðir: Hægt er að stilla verkefnaflokka til að sleppa lægstu einkunnum, en það krefst vandaðrar uppsetningar. Sjá nánar í Canvas-leiðbeiningunum.

Viltu kynna þér efnið nánar?

Í Canvas-leiðbeiningum HÍ finnurðu ítarlegri leiðbeiningar um verkefnaflokka, vægi, punkta og fleiri möguleika við útreikning einkunna.

Vægi verkefna og fjöldi punkta – Canvas-leiðbeiningar HÍ ↗

VERKEFNI

Prófaðu að stilla vægi

Opnaðu æfingasvæðið þitt í Canvas.

Stofnaðu tvo verkefnaflokka: Verkefni og Próf.
Stilltu vægi þeirra á 40% og 60%.
Færðu verkefnið sem þú stofnaðir í 8. hluta í verkefnaflokkinn Verkefni. Ef þarf geturðu stofnað annað æfingaverkefni eða æfingapróf í flokknum Próf.
Opnaðu Einkunnir og skoðaðu hvernig verkefnaflokkarnir birtast þar.

Að lokum skaltu velta fyrir þér:

Hvað gerist ef tvö verkefni í sama verkefnaflokki eru annars vegar 10 punkta og hins vegar 20 punkta virði?

SJÁLFSMAT

Hvað hefurðu lært?

Að þessum hluta loknum ættirðu að geta:

útskýrt muninn á verkefnaflokki og staku verkefni.
stofnað verkefnaflokka og stillt vægi þeirra.
sett matsatriði í viðeigandi verkefnaflokk.
útskýrt muninn á vægi verkefnaflokks og punktafjölda verkefnis.
skoðað vægi verkefnaflokka í einkunnabókinni.

ⓘ Spurningar eða ábendingar?

Var eitthvað óskýrt eða vantar upplýsingar? Við tökum gjarnan við spurningum og ábendingum sem hjálpa okkur að bæta námskeiðið.

✉ Sendu okkur skilaboð á kennslumidstod@hi.is