Grunnþjálfun í Canvas – Skref fyrir skref

Í þessum hluta lærir þú að setja upp námskeiðsvef. Þú býrð til einingar, setur inn skrár og síður, raðar efninu og birtir það fyrir nemendum.

Myndband

Í myndbandinu skaltu sérstaklega taka eftir:

Hvernig eining er búin til.
Hvernig skrá og síðu er bætt í einingu.
Muninum á að setja skrá beint í einingu og tengja í hana frá síðu.
Hvernig efni er fært, fjarlægt og afritað.
Hvernig atriði, einingar og námskeið eru birt.

Smelltu á litlu örina neðst í spilaranum til að sjá kafla myndbandsins og velja þann sem þú vilt skoða.

Byrjaðu á einföldu og samræmdu skipulagi

Einingar mynda meginuppbyggingu námskeiðsins. Þær raða námsefni og verkefnum í þá röð sem nemendur eiga að vinna þau. Algengt er að skipuleggja námskeið eftir vikum, viðfangsefnum eða köflum. Veldu eina meginreglu og notaðu hana með samræmdum hætti.

1. vika | Inngangur Viðfangsefni 1 | Helstu hugtök Kafli 1 | Fræðilegur grunnur

Búðu til einingu

Veldu heim í námskeiðsvalmyndinni.
Smelltu á + eining.
Gefðu einingunni lýsandi heiti.
Smelltu á bæta við einingu.

Gerðu röðina fyrirsjáanlega

Notaðu sömu grunnröð og sambærilegar textafyrirsagnir í öllum einingum, til dæmis:

Yfirlit og markmið
Lesa og horfa
Ræða og æfa
Skila

Notaðu lýsandi heiti á öllu efni. Fyrirlestur 1 – Helstu hugtök segir nemendum meira en Glærur eða Skjal 2.

Forðastu of langar einingar. Ef mörg atriði eru í einingu getur hún orðið óþarflega löng og erfitt að fá yfirsýn yfir efnið. Þá getur verið betra að safna tengdu efni saman á eina síðu eða skipta efninu niður í fleiri, styttri einingar. Þú munt læra nánar um síður í 6. hluta.

Bættu efni í eininguna

Smelltu á plústáknið (+) við heiti einingar.

plús tákn í einingu

Þá opnast gluggi þar getur þú bætt við síðu, skrá, verkefni, prófi, umræðu, ytri vefslóð, ytra tæki eða textafyrirsögn.
Þú getur valið efni sem þegar er til í námskeiðinu eða búið til nýtt. Ný síða, verkefni eða próf sem stofnað er í einingu verður jafnframt til á viðeigandi stað í Canvas. Sem dæmi vistast síða ávallt í síðusafni námskeiðs (síður í valmynd) hvar sem kennarinn stofnar síðuna og verkefni vistast undir verkefni í valmyndinni en tengill á síðuna eða verkefnið verður um leið til í einingunni.

bæta við efni

Canvas-moli: Eining geymir í raun ekki efnið sjálft. Hún er efnisyfirlit sem vísar með tenglum á síður, skrár, verkefni og annað efni námskeiðsins.

Að fjarlægja er ekki það sama og að eyða

Ef atriði er fjarlægt úr einingu er efnið áfram til staðar í síðum, skrám, verkefnum, prófum eða umræðum.

Fjarlægja úr einingu tekur tengilinn úr skipulaginu.
Eyða á upprunastað fjarlægir efnið úr námskeiðinu.

Færðu efnið í rétta röð

Dragðu einingu eða atriði á nýjan stað með handfanginu vinstra megin við heitið. Einnig er hægt að velja færa til undir þrípunktinum. Þrípunkturinn geymir fleiri aðgerðir sem fara eftir því hvaða atriði hann tilheyrir.

Á að setja skrána beint í einingu eða á síðu?

Skrá er hægt að setja beint í einingu þegar heiti hennar er skýrt, hún getur staðið sjálfstætt og nemendur þurfa engar sérstakar leiðbeiningar. Oft er þó betra að setja skrá á síðu ásamt stuttum inngangi. Þar getur þú útskýrt hvers vegna nemendur eiga að skoða efnið, að hverju þeir eiga að beina athyglinni og hvað þeir eiga að gera næst.

Á síðu er hægt að setja saman texta, myndir, upptökur og tengla. Síður aðlagast mismunandi skjástærðum og auðvelt er að uppfæra þær beint í Canvas.

Skrá beint í einingu

Heitið er skýrt og lýsandi.
Hlutverk skjalsins er augljóst.
Nemendur þurfa aðeins að opna skjalið.

Skrá á síðu

Efnið þarf inngang eða samhengi.
Fleiri skrár eða slóðir eiga saman.
Bæta þarf við leiðbeiningum eða öðru efni.

Búðu til síðu og tengdu í skrá

Smelltu á plústáknið (+) við eininguna.
Veldu Síða og síðan Búa til síðu.
Gefðu síðunni lýsandi heiti, opnaðu hana og veldu Breyta.
Skrifaðu inngang eða leiðbeiningar.
Veldu skrá úr námskeiðsskrám eða hladdu henni upp og búðu til lýsandi tengil.
Vistaðu síðuna.

Hvar vistast skrárnar?

Skrár sem þú hleður upp í einingu eða setur á síðu vistast sjálfkrafa undir Skrár. Nemendur fá aðgang að þeim í gegnum einingar og síður en ekki beint í skráarsafnið.

Flokkaðu skrár í möppur svo skráarsafnið verði ekki óskipulagt. Upptökur eiga heima í Panopto eða Canvas Studio, ekki í skráarsafni námskeiðsins.

Notaðu lýsandi tenglatexta, til dæmis heiti greinar eða skjals, í stað „Smelltu hér“.

Birtu efnið og prófaðu það

Þrjú birtingarstig þurfa að passa saman:

Atriðið þarf að vera birt, til dæmis síðan, skráin eða verkefnið.
Einingin sem atriðið er í þarf að vera birt.
Námskeiðið sjálft þarf að vera birt.

Mikilvægt: Grænt birtingartákn merkir að atriði eða eining sé birt. Birt atriði inni í óbirtri einingu er ekki aðgengilegt nemendum úr einingunni.

Skoðaðu sem nemandi

Veldu Skoða sem nemandi efst hægra megin. Athugaðu hvort rétt efni sjáist, skrár og tenglar opnist og leiðin í gegnum eininguna sé skýr. Veldu Fara úr nemendasýn neðst hægra megin þegar yfirferðinni er lokið; ekki nægir að nota bakkahnapp vafrans.

Birtu námskeiðið

Þegar námskeiðið er tilbúið velur þú Birta á heimasíðu þess. Mælt er með að námskeiðsvefur sé birtur að minnsta kosti tveimur vikum áður en kennsla hefst.

Þú getur áfram unnið að óbirtu efni inni í námskeiði sem hefur verið birt.

Viltu kynna þér efnið nánar?

Í Canvas-leiðbeiningum HÍ finnurðu ítarlegri upplýsingar um skipulag eininga og hvernig þú undirbýr námskeiðsvef fyrir nemendur.

Skipulag og bygging námskeiðsvefs – Canvas-leiðbeiningar HÍ ↗

Er námskeiðsvefurinn tilbúinn? – Canvas-leiðbeiningar HÍ ↗

Verkefni

Settu upp fyrstu eininguna

Búðu til einingu og gefðu henni lýsandi heiti.
Bættu við textafyrirsögninni Lesa og horfa.
Búðu til síðu með stuttum inngangi.
Hladdu upp skrá og tengdu í hana með lýsandi tenglatexta.
Settu einnig skrá beint í eininguna og berðu framsetninguna saman.
Raðaðu og birtu efnið.
Skoðaðu niðurstöðuna í nemendasýn.

Að lokum skaltu velta fyrir þér:

Hvað þurfa nemendur að sjá til að skilja ekki aðeins hvað á að opna heldur einnig hvers vegna og hvað á að gera?

Sjálfsmat

Getur þú lagt grunn að námskeiðsvef?

Að þessum hluta loknum get ég:

valið samræmt skipulag fyrir einingar námskeiðsins,
búið til einingu og bætt inn síðu, skrá og textafyrirsögn,
útskýrt muninn á einingu og efninu sem hún vísar á,
metið hvort skrá eigi að vera beint í einingu eða á síðu,
raðað og birt efni, einingu og námskeið,
yfirfarið uppsetninguna í nemendasýn.

Spurningar eða ábendingar?

Var eitthvað óskýrt eða vantar upplýsingar? Við tökum gjarnan við spurningum og ábendingum sem hjálpa okkur að bæta námskeiðið.

✉ Sendu okkur skilaboð á kennslumidstod@hi.is