Grunnþjálfun í Canvas – Skref fyrir skref

Í þessum hluta færðu yfirsýn yfir námskeiðsvef í Canvas og hvernig efni hans er skipulagt. Þú kynnist valmynd námskeiðsins, heimasíðunni, einingum og þeim upplýsingum og aðgerðum sem birtast nemendum og kennurum.

Taktu vel eftir heitum í Canvas

Þegar þú skoðar námskeiðsvefinn skaltu taka eftir því hvað ólík svæði og verkfæri heita. Heitin birtast bæði í leiðbeiningum og í skilaboðum frá Canvas. Að þekkja þau auðveldar þér að finna réttar leiðbeiningar, fylgja þeim og skilja tilkynningar og villumeldingar kerfisins.

Myndband

Í myndbandinu skaltu sérstaklega taka eftir:

Hvernig námskeiðsvefur skiptist í valmynd (leiðartré), meginsvæði og hægri dálk.
Hvernig valmynd námskeiðsins veitir aðgang að heimasíðunni og öðrum svæðum námskeiðsvefsins.
Hvernig einingar eru notaðar til að skipuleggja námsefni og verkefni.
Hvernig birt og óbirt efni er auðkennt.
Hvernig kennarasýn og nemandasýn eru ólíkar og hvernig nemandasýn hjálpar kennara að yfirfara námskeiðið.
Hvað þarf að vera skýrt fyrir nemendum þegar þeir opna námskeiðið í fyrsta sinn.

Kynntu þér námskeiðsvefinn

Kennarar geta skipulagt námskeiðsvefi á mismunandi hátt, en sömu meginsvæði eru yfirleitt á námskeiðsvef.

Heimasíða námskeiðs. Þrír dálkar: 1) Valmynd námskeiðs, 2) Meginsvæði, 3) Hægri dálkur.

1. Valmynd námskeiðsins

Valmyndin vinstra megin veitir aðgang að hlutum námskeiðsins, til dæmis heim (heimasíða), tilkynningum, kennsluáætlun, verkefnum, einkunnum og fólki. Hún tilheyrir aðeins námskeiðinu sem er opið og er því frábrugðin dökkbláu Canvas-valmyndinni lengst til vinstri. Kennarinn getur valið hvaða tenglar birtast í valmyndinni. Nánar er farið í það í 4. hluta.

2. Meginvinnusvæðið

Á miðri síðunni birtist það efni eða verkfæri sem hefur verið valið. Þar geta til dæmis birst einingar, síður, verkefni, kennsluáætlun eða einkunnabók.

3. Hægri dálkur

Hægri dálkurinn er breytilegur út frá því hvað er opið og hvort notandinn er kennari eða nemandi. Kennari getur meðal annars séð þar aðgerðir til að birta námskeið, skoða námskeið sem nemandi og flytja inn efni. Nemendur sjá frekar upplýsingar um það sem er á döfinni.

Hafðu í huga: Kennari sér fleiri tengla og aðgerðir en nemendur. Það sem þú sérð í kennarasýn er því ekki endilega sýnilegt nemendum.

Heimasíðan er upphafsstaður námskeiðsins

Þegar þú opnar námskeið birtist heimasíða þess. Tengillinn heim opnar alltaf heimasíðuna. Hún á að hjálpa nemendum að átta sig fljótt á um hvaða námskeið er að ræða, hvar efnið er og hvað þeir eiga að gera næst.

Valmynd námskeiðs

Í námskeiðum Háskóla Íslands sýnir heimasíðan sjálfkrafa einingarnar þar sem efnið er skipulagt. Þannig sjá nemendur strax skipulag námskeiðsins og geta byrjað að vinna sig í gegnum efnið.

Mögulegt er að skipta um heimasíðu námskeiðs, búa til sérsniðna heimasíðu, eða láta kennsluáætlun, verkefnalista eða nýlega virkni vera heimasíðu. Í þessu grunnnámskeiði er gert ráð fyrir að kennarar noti sjálfgefnu heimasíðuna sem birtir einingarnar, því verður ekki farið nánar í möguleika á öðrum heimasíðum hér. Ef þú vilt kynna þér efnið nánar skaltu skoða heimasíða námskeiðs á canvas.hi.is

Einingar gefa námskeiðinu skipulag

Einingar raða námsefni og verkefnum í skýra röð. Ein eining getur til dæmis staðið fyrir viku, viðfangsefni, kafla eða kennslulotu. Í henni geta verið síður, skrár, myndbönd, tenglar, verkefni, umræður og próf.

Einingin á myndinni stendur fyrir eina viku og efnið er flokkað undir fyrirsagnir. Gott er að nota sama skipulag í öllum einingum námskeiðsins.

Eining er eins konar efnisyfirlit. Hún heldur utan um röð atriðanna en geymir þau ekki sjálf. Sama verkefni getur því verið aðgengilegt bæði úr einingu og undir tenglinum verkefni í valmynd námskeiðsins.

Samræmi: Notaðu sömu meginskipan í öllum einingum.
Lýsandi heiti: Heiti eininga eiga að segja skýrt hvað er í einingunni eða hvað nemandinn á að gera.
Fyrirsjáanleg röð: Nemendur eiga ekki að þurfa að leita að lesefni, upptökum eða verkefnum.

Í 3. hluta lærir þú að búa til einingar, bæta í þær efni og raða því.

Birt efni og óbirt – kennarasýn og nemendasýn

Birt og óbirt efni

Þegar efni er óbirt getur kennari unnið að efninu án þess að nemendur sjái það. Grænt birtingartákn merkir að atriði hefur verið birt nemendum. Til þess að efni inni í einingu verði aðgengilegt þarf að birta bæði atriðið og eininguna sem það er í. Auk þess þarf námskeiðið að vera birt.

Bæði einingin og atriðin þurfa að vera birt

Nemendur hafa aðgang efninu á myndinni svo framarlega sem námskeiðið sjálft hefur verið birt.
Óbirt eining virkar eins og læst skúffa. Nemendur hafa ekki aðgang að atriðum inn í einingunni þó svo að þau hafi verið birt.

Dæmi um algeng mistök

Kennari birtir verkefni en setur það í einingu sem er óbirt. Nemendur sjá þá hvorki eininguna né tengilinn á verkefnið. Bæði verkefnið og einingin þurfa að vera birt.
Ef nemandi finnur verkefnið undir verkefni í valmynd námskeiðsins og reynir að opna það fær hann skilaboð um að verkefnið tilheyri óbirtri einingu og sé því ekki aðgengilegt.

Þessi einföldu mistök verða ósjaldan til þess að nemendur eða kennarar leita aðstoðar stoðþjónustu.

Kennari sér meira en nemandi

Kennari sér meðal annars

hnappa til að breyta og bæta við efni,
óbirt efni og falda tengla,
stillingar og umsýsluaðgerðir.

Nemandi sér

aðeins birt efni sem hann hefur aðgang að,
valda tengla í valmyndinni,
verkefni, einkunnir og endurgjöf sem hafa verið birt.

Í 9. hluta námskeiðsins verður farið nánar í nemandasýn og hvernig prófunarnemandi námskeiðs virkar.

Valmynd námskeiðs getur verið mismunandi

Kennari ákveður hvaða tenglar eru sýnilegir nemendum. Þess vegna geta valmyndir verið ólíkar milli námskeiða.

Auga með skástriki við tengil merkir að hann sé ekki sýnilegur nemendum. Nánar verður fjallað um stillingar og leiðarstýringu í 4. hluta.

Viltu kynna þér efnið nánar?

Í Canvas-leiðbeiningum HÍ finnurðu ítarlegri upplýsingar um uppbyggingu námskeiðsvefs og heimasíðu námskeiðs.

Heimasíða námskeiðs – Canvas-leiðbeiningar HÍ ↗

Grunnatriði Canvas ↗

VERKEFNI

Kortleggðu námskeiðsvefinn

Opnaðu æfingasvæðið þitt og finndu:

heimasíðu námskeiðsins,
valmynd námskeiðsins,
meginvinnusvæðið og hægri dálkinn,
dæmi um birt og óbirt atriði.
Nemandasýn / Skoða sem nemandi.

Smelltu á tvö eða þrjú atriði í valmyndinni og fylgstu með því hvernig meginvinnusvæðið og hægri dálkurinn breytast.

Að lokum skaltu íhuga:

Hvað nemendur þurfa að sjá þegar þeir opna námskeiðsvef í fyrsta skipti,
og hvernig þú getur hagað námskeiðsvefnum þannig að nemendur sjái alltaf hvað þeir eiga að gera næst.

SJÁLFSMAT

Þekkir þú uppbyggingu námskeiðs?

Að þessum hluta loknum get ég:

greint á milli Canvas-valmyndarinnar og valmyndar námskeiðs,
bent á heimasíðu, meginvinnusvæði og hægri dálk,
útskýrt hlutverk eininga,
lýst muninum á kennarasýn og nemendasýn,
séð hvort eining eða atriði er birt.

ⓘ Spurningar eða ábendingar?

Var eitthvað óskýrt eða vantar upplýsingar? Við tökum gjarnan við spurningum og ábendingum sem hjálpa okkur að bæta námskeiðið.

✉ Sendu okkur skilaboð á kennslumidstod@hi.is