Til baka í grunn námskeiðsvefs

Aðgengi fyrir alla er lykilatriði í hönnun Canvas. Það er hins vegar að miklu leyti undir vinnulagi kennara komið að aðgengi námskeiðsvefs haldist gott. Máli skiptir að tileinka sér vinnubrögð sem styðja við skilvirkni, notendavænleika og aðgengi þegar námskeiðsvefur er settur upp. Sjá nánar What are the Canvas accessibility standards?

Með því að tryggja að atriðin í listanum séu í lagi í þínum námskeiðum stuðlar þú að góðu aðgengi og almennu samræmi á milli námskeiðsvefja.

Smelltu á atriði til að sjá nánari lýsingu og tengla á leiðbeiningar.

1. Skipulag námskeiðsvefs er skýrt og auðskilið

Einingar og síður eru aðaltólin til að skipuleggja og byggja upp námskeiðsvefinn, einingar til að skipta upp námskeiðssíðunni í vikur eða námshluta, síður til fíngerðari flokkunar á námsefni og gögnum, s.s. til að setja tengla í greinar og annað lesefni viku upp á síðu. Góð þumalputtaregla er að hafa vefinn eins einfaldan og knappan og unnt er án þess að fórna skýrleika.

Nokkur einföld ráð um skipulag og byggingu eininga sem stuðla að notendavænleika og aðgengi námskeiðsvefs.

Þegar unnið er í síðum er nauðsynlegt að þekkja aðgerðir í Canvas-ritlinum.

Skýr uppsetning og gott skipulag eykur skilvirkni námskeiðsvefs og dregur úr þeim tíma sem nemendur eyða í leit að efni. Þetta er áríðandi fyrir alla nemendur en ef skipulagi er ábótavant bitnar það enn meira á þeim sem búa við skerðingu.

Sjá einnig Um skipulag og hönnun námskeiðs.

2. Leiðarstýring námskeiðs hefur verið yfirfarin

Í leiðarstýringu (valmynd vinstra megin) eiga eingöngu að vera tenglar sem notaðir verða í námskeiðinu. Óþarfa tenglar valda oft misskilningi hjá nemendum og tenglar sem vantar valda skertu aðgengi. Skoðaðu námskeiðsvefinn í nemandasýn til að sjá hvaða tengla nemendur sjá í leiðarstýringu.

Algengast er að eftirfarandi tenglar séu nauðsynlegir: Heim, tilkynningar, kennsluáætlun, verkefni, einkunnir, fólk og Panopto video ef forritið Panopto er notað fyrir upptökur námskeiðs.

Sjá nánar um leiðarstýringu.

3. Tungumál námskeiðsvefs er í samræmi við tungumál kennslu

Til að stilla tungumál námskeiðsvefs er farið í stillingar neðst í leiðarstýringu vefsins og námskeiðsupplýsingar (fyrsti flipi efst). Skrolla þarf aðeins niður á síðunni að tungumálastillingunni. Eftir að tungumáli er breytt þarf að smella á Uppfæra námskeiðsupplýsingar neðst á síðunni.

4. Kennsluáætlun er á réttum stað

Til að gæta samræmis á milli námskeiða ætti kennsluáætlun ávallt að vera undir tenglinum kennsluáætlun í leiðarstýringu námskeiðs. Þar er henni ætlað að vera.

Sjá nánar um kennsluáætlun.

5. Skiladagar og viðburðir koma fram í námskeiðsdagatali

Athugaðu að öll verkefni og próf séu uppsett og birt nemendum, að skiladagar séu réttir og að aðrir viðburðir námskeiðs, ef einhverjir eru, séu skráðir í námskeiðsdagatal. Skiladagar koma sjálfvirkt fram í námskeiðsdagatali svo framarlega sem verkefni eru birt nemendum.

Nemendur hafa yfirsýn yfir skiladaga og viðburði í öllum sínum námskeiðum í dagatalinu sínu, geta skoðað álagstímabil og skipulagt námið fram í tímann.

Sjá nánar um námskeiðsdagatalið.

Til að uppfæra dagsetningar allra verkefna á einum stað skaltu skoða: How do I bulk update due dates and availability dates as an instructor?

6. Vægi verkefna er uppsett

Eftir að vægi verkefna og prófa hefur verið sett upp í Canvas kemur það fram hjá nemendum undir einkunnum, í kennsluáætlun og verkefnum, s.s. upplýsingar um vægi eru aðgengilegar alls staðar þar sem við á. Það fer best á því að vægi sé uppsett í upphafi námskeiðs, enda fljótlegt verk fyrir kennara í langflestum tilvikum. Það eykur einnig meðvitund nemenda um mikilvægi einstakra verkefna.

Sjá leiðbeiningar um uppsetningu vægis.

7. Gert er ráð fyrir nemendum með sérúrræði

Í Canvas er einfalt að gefa nemendum mismunandi skilafresti. Það er gert í uppsetningu verkefnis, umræðu eða prófs. Sjá Nemanda gefinn lengri skilafrestur. Vegna nemenda sem búa við skerðingu er mikilvægt að huga vel að öllum atriðum þessa lista.

Sjá einnig upplýsingar fyrir kennara á vef nemendaráðgjafar.

8. Tenglar í skjöl og gögn eru aðgengilegir

Heiti tengla er lýsandi

Texti tengils á að vera lýsandi fyrir efnið sem hann opnar t.d. titill greinar sem tengt er í. Gott er að láta upplýsingar um lengd efnis fylgja með inn í tengli t.d. blaðsíðufjölda Word eða pdf skjala. Þau sem nota skjálesara til að lesa vefsíðu velja stundum að kalla fram lista yfir alla tengla síðu án þess að lesa allt efnið eða nota tab hnapp lyklaborðsins til að fara á milli tengla. Þá er áríðandi texti tengilsins sé upplýsandi. Ekki nota texta eins og „Lesa meira“ eða „Smella hér“.

Allir tenglar opna viðeigandi efni

Kannaðu hvort tenglar í námskeiðinu opna það sem þeim er ætlað. Mikilvægt er að gera þetta í nemandasýn.

Hægt er láta Canvas hjálpa til við að finna tengla sem hugsanlega eru óvirkir með aðgerðinni Staðfesta tengla í efni undir stillingum námskeiðs. Sjá nánar: How do I validate links in a course?

9. Efni sem kennari setur upp er aðgengisprófað

Notaðu hnappinn Athugun á aðgangi þegar þú vinnur efni í Canvas-ritlinum. Hnappurinn hjálpar við að aðgengisprófa efnið og kemur með tillögur að breytingum. Þó verkfærið sé ekki fullkomið þá er a.m.k. hægt að láta minna sig á að laga nokkur algeng mistök s.s. að gleyma að setja annan texta fyrir mynd, auka skerpu í lit texta o.fl. Sjá nánar um Stafrænt aðgengi námskeiðsvefs.

Hugaðu að eftir farandi atriðum í efni sem þú setur upp:

Að uppsetning texta sé skýr.
Að nota möguleika ritilsins til að setja upp fyrirsagnir (heading 2, heading 3 o.s.frv.), ekki stækka einungis letrið. Þetta er áríðandi vegna nemenda sem nota skjálesara.
Að hafa texta tengla lýsandi.
Að setja ávallt punkt í lok setninga (áríðandi vegna skjálesara).
Að hafa næga skerpu á milli texta og bakgrunns t.d. svartan texta á hvítum grunni.
Að taka tillit þeirra sem hafa takmarkaða litaskynjun eða litblindu. Nota t.d. ekki litasamssetningarnar rautt/grænt, gult/blátt eða svart/rautt. Mikilvægt er að miðla ekki upplýsingum með lit eingöngu s.s. „röng atriði eru sýnd með rauðu“ eða "bláar tölur eiga við þetta ár". Sjá nánar t.d. W3C Use of color.
Að laga atriði í samræmi við tillögur aðgengileikakönnunar (hnappurinn athugun á aðgangi).

10. Skannað efni er í háum gæðum

Skannað efni skal vera skýrt og læsilegt og virka í skjálesurum. Sjá nánari upplýsingar: Skannað efni.

11. Myndir námskeiðs eru aðgengilegar

Alt-texti (e. alternative text) þarf að fylgja öllum myndum sem ekki eru skilgreindar sem myndskreytingar.

Þetta er sá texti sem er lesinn upp þegar vefsíða er skoðuð með skjálesara t.d. af blindum og sjónskertum. Alt-texti birtist einnig í stað myndar, áður en mynd nær að hlaðast t.d. þegar mynd er þung, nettenging hæg eða þegar vefsíða er skoðuð án mynda.

Alt-texti lýsir innihaldi myndar og á að vera stuttur og skorinorður án þess að fórna nákvæmni. Hann inniheldur venjulega örfá orð en eina til tvær setningar í undantekningartilvikum. Sama mynd getur haft mismunandi alt-texta eftir því í hvaða samhengi hún er birt.

Alt-texti á ekki: að endurtaka það sem kemur fram í texta við lýsingu myndar eða innihalda „mynd af“ eða „myndin sýnir“ þar sem skjálesarinn tilkynnir að um mynd sé að ræða.

Ef mynd er eingöngu til skreytingar skal merkja við það og sleppa alt-texta. "

Sjá nánari upplýsingar og dæmi um alt-texta mynda: Alternative Text WebAIM web accessibility in mind.

12. Notkun á töflum samræmist viðmiðum um aðgengileika

Töflur skyldi eingöngu að nota til þess að birta gögn sem krefjast framsetningar í töflu. Ekki á að nota töflur til að móta viðmót svo sem til að staðsetja texta og mynd. Töflur henta illa snjalltækjum og aðlagast ekki skjástærð notenda. Þegar gögn eru birt í töflu er nauðsynlegt að hafa fyrirsagnir á dálkum og/eða línum.

13. Námskeiðsvefur hefur verið birtur ásamt innihaldi

Mælt er með að birta námskeiðsvef a.m.k. tveimur vikum áður en kennsla hefst. Það gefur nemendum tækifæri til að skima námskeiðsvefinn, skoða álagstímabil og skipuleggja námið. Tímanleg birting námskeiðsvefs er einnig mikilvæg svo aðstoðarfólki nemenda gefist ráðrúm til að kynna sér vefinn. Nemendur hafa ekki aðgang að óbirtum námskeiðsvef og fá ekki tilkynningar í tölvupósti.

Sjá nánar: Námskeiðsvefur birtur nemendum.

Notaðu nemandasýnina til að sannreyna að nemendur hafi aðgang að öllu efni vefsins.

14. Námskeiðið virkar vel í appinu

Námskeiðsvefurinn lítur svolítið öðruvísi út í appinu. Kannaðu hvort allt birtist eðlilega og efni sem þú deilir með nemendum sé læsilegt. Nemendur nota Canvas-appið mikið.

15. Tekið er tillit til sjónarmiða nemenda

Ávallt ætti að kynna námskeiðsvef fyrir nemendum í byrjun námskeiðs og útskýra hvernig vefurinn muni verða notaður.

Það sem kennaranum finnst augljóst og skýrt sjá nemendur ekki endilega í sama ljósi. Fáðu nemendur til að segja sitt álit. Settu t.d. upp umræðu þar sem nemendur geta komið með ábendingar um það sem betur má fara og leyfðu nafnleysi í uppsetningu umræðunar. Einnig er hægt að leggja fyrir stutta könnun t.d. um mitt misserið. Dæmi: Könnun um gæði námskeiðsvefs.