Einkunnir - Endurgjöf - Vægi

Mælt er með að setja upp strax í upphafi misseris (eða fyrr) verkefni og annað sem á að gilda til einkunnar í námskeiði, ásamt því að setja upp vægi verkefna.

Athugið að þó verkefni séu sett upp í byrjun misseris og birt nemendum er ekki nauðsynlegt að setja inn nákvæmar verkefnalýsingar eða prófspurningar strax, þar sem nemandinn fær hvort eð er ekki aðgang að þeim fyrr en þegar skil eiga að hefjast (út frá stillingum dagsetninga).

Hvers vegna er betra að hafa námsmat uppsett í byrjun misseris?

Vegna nemenda:

Það styður við vel skipulagt nám. Nemandinn fær betri yfirsýn yfir þá vinnu sem námskeið krefst og getur skipulagt vinnu sína og frítíma fram í tímann.
Það gefur nemanda betri heildarmynd af námskeiði sjá verkefni og próf á námskeiðsvefnum.
Skiladagar koma sjálfvirkt fram í dagatali námskeiðs. Nemandi getur einnig skoðað öll sín námskeiðsdagatöl saman í sínu dagatali og séð t.d. hvenær álagspunktar verða á misserinu.
Nemandinn sér hvað í námsmatinu er mikilvægast (út frá vægi).
Uppsett verkefni og vægi koma sjálfvirkt fram í kennsluáætlun námskeiðs í Canvas. Til að stuðla að bættu samræmi námskeiðsvefja væri best ef verkefni og vægi kæmu fram í kennsluáætlun allra námskeiða nemanda í upphafi misseris.
Þegar verkefni eru tilbúin í upphafi misseris sér nemandinn strax hvernig umhverfi námskeiðsvefs er skipulagt og það er ljóst hvar á að skila verkefnum.

Vegna kennara:

Þegar vandlega er staðið að uppsetningu verkefna og vægis í upphafi minnka líkur á að í lok misseris þurfi kennari að breyta uppsetningu verkefna, punktum eða vægi (eftir einkunnagjöf), sem getur í sumum tilfellum kostað kennarann ómælda vinnu aukalega s.s. að skrá allar einkunnir upp á nýtt. Í lok misseris er einnig mesti álagstíminn hjá stoðþjónustunni, því gæti kennari þurft að bíða eftir aðstoð einmitt þegar síðustu forvöð eru að skila lokaeinkunnum.
Ef verkefni eða annað vegna námsmats er sett upp á réttan hátt frá upphafi, koma síður upp vandamál þar sem kennari þarf að svara tölvupóstum eða leita til stoðþjónustu þegar kemur að skilum.
Þegar það er skýrt frá upphafi hvenær á að skila verkefnum, og hvaða viðmið gilda, minnka líkur á seinum skilum.
Ef verkefni og vægi er uppsett og tilbúið frá byrjun námskeiðs er einfaldara hjá kennara að leita til nemenda varðandi endurgjöf um námskeiðsvefinn og námsmatið, í því skyni að þróa vefinn og gera enn betri eða gera námmatið sem dæmi fjölbreyttara.

Sú vinna sem lögð er í námskeiðsvefinn nýtist kennara næst þegar námskeið er haldið, þar sem hægt er að afrita efni og uppsetningu.

Áríðandi er að verkefni og vægi séu sett upp á réttan hátt í Canvas og að þær stillingar séu valdar sem best henta kennslu og námskeiði. Leitið til starfsfólks Kennslusviðs (help@hi.is) til að fá upplýsingar ef eitthvað er óljóst varðandi uppsetningu verkefna/prófa, punkta, vægi eða útreikning lokaeinkunna.

Leiðbeiningar

Skil nemenda: Verkefni - Próf - Umræður - M.a. um hvernig verkefni eru sett upp og möguleika í stillingum.

Vægi verkefna og fjöldi punkta - Það er sérstaklega einfalt og notendavænt í Canvas að setja upp vægi verkefna. Við einkunnagjöf koma upp vandamál þegar gleymist að gefa verkefni punkta eða þegar rangur punktafjöldi er tilgreindur.

Að gefa einkunn og endurgjöf - Kennarar hafa ítrekað lýst ánægju sinni með „SpeedGrader“ sem hefur reynst vel þegar kemur að því að gefa einkunn, endurgjöf o.fl.

Einkunnabók námskeiðs - Hér eru ýmis mikilvæg atriði varðandi einkunnir s.s. að fela og birta einkunnir verkefnis o.fl.

Frágangur einkunnabókar og skráning lokaeinkunna í Uglu - Um hvernig þarf að ganga frá Canvas einkunnabókinni svo hægt sé að flytja lokaeinkunnir í Uglu.